tert.am
27.03.2010
«Նորմալ երիտասարդությունը պայքարում է բոլոր բացասական երևույթների դեմ ու անհնար է, որ պայքարն արդյունք չունենա»,- Tert.am-ի հետ զրույցում ասաց «Սարգիս Տխրունի» երիտասարդական ուսանողական միության ատենապետ Գարիկ Մանուկյանը: Նշենք, որ միության անդամները միացել են այն երիտասարդների նախաձեռնությանը, ովքեր ստորագրահավաք են կազմակերպել՝ պահանջելով չքանդել «Մոսկվա» կինոթատրոնի ամառային դահլիճը։
«Եկեղեցիների պակասություն Երևանում չկա։ Ավելի լավ կլինի, եթե այդ եկեղեցին կառուցողները` բարերարները, վերանորոգեն Հայաստանում գտնվող և պատմամշակութային մեծ արժեքներ ներկայացնող այն եկեղեցիները, որոնք կարիք ունեն վերանորոգման»,– ասաց Գարիկ Մանուկյանը՝ բարերարներին խորհուրդ տալով իրենց գումարները ներդնել այդ ուղղությամբ։
«Մեր հոգևոր հայրերը թող պաշտպան կանգնեին իրենց հոտին, երբ նրան գնդակահարում էին, ոչ թե միայն եկեղեցի սարքելով հիշեն քրիստոնեության մասին: Քրիստոնեությունը առաջին հերթին բարություն է, սեր է ժողովրդի հանդեպ, իսկ այդ սերը մենք մարտի 1–ին չտեսանք»,- նշեց Գարիկ Մանուկյանը։
