Ինչպես հայտնում է Վրաստանի առողջապահության նախարարությունը, իրենց մոտ արդեն խոզի գրիպ կա. դրանով վարակվել է Թուրքիայում հանգստանալուց հետո Վրաստան վերադարձած մի երիտասարդ աղջիկ: Հիվանդի առողջական վիճակը թեեւ բավարար է, բայց նա գտնվում է բժիշկների հսկողության ներքո:
Ինչպես հաղորդում է Panorama.am-ը, նախարարությունում հատկանշել են, որ դա վարակի երկիր բերման առաջին դեպքը չէ, դեռեւս չի հայտնաբերվել այնպիսի մի դեպք, որ հիվանդությունը գրանցվի հենց երկրի ներսում, կամ այնպիսինը, որ վարակը մարդուց մարդ փոխանցվի:
Մինչ այս Վրաստան վարակը բերվել է Գերմանիայից, Իսպանիայից եւ Անգլիայից: Հարկ է նշել, որ մինչ այս երկրում գրանցված 13 դեպքերը ծանր չեն եղել եւ հեշտ են բուժվել:
Panorama.am-ի հետ զրույցում առողջապահության նախարարության իմունականխարգելման ազգային ծրագրի ղեկավար Գայանե Սահակյանը վստահեցրել է, որ հանրապետությունում Ա գրիպի` H1N1-ի ոչ մի դեպք չի գրանցվել:
Մասնագետի խոսքերով, եղել են դեպքեր, երբ մարդկանց մոտ հիվանդության առկայության կասկածներ են եղել, բայց լաբորատոր հետազոտությունները դրական պատասխան չեն տվել:
Հիշեցնենք, որ hանրապետությունում շարունակվում է վարակի ներբերման եւ տարածման կանխարգելմանն ուղղված հակահամաճարակային միջոցառումների իրականացումը: Շարունակվում է ուղեւորների առողջության նկատմամբ մոնիթորինգի իրականացումը: 2009թ. օգոստոսի 17-ի դրությամբ, ԱՀԿ-ի պաշտոնական հաղորդագրության համաձայն, մարդկանց շրջանում H1N1 վիրուսով հարուցված գրիպի 177.457 դեպք է գրանցվել, այդ թվում նշվում է 1462 մահվան դեպքի մասին:
“Լուսանցք” թիվ 118, սեպտեմբեր 25- հոկտեմբեր 1 2009թ.
ՎԱՀԱԳՆԱԿԱՆՉ 
Թողնել պատասխան