Մեր զլմ-ներում, հատկապես՝ հեռուստատեսային, վերստին սկսել է գերակշռել ժարգոնային լեզուն, նաեւ նման լեզվաոճին համապատասխան անիմաստ հաղորդումները: Հեռուստաեթերը խցանվել է անգրագետ հաղորդավարների առկայությունից եւ դատարկաբանություն քարոզող “նորաոճ” հաղորդումներից: Իսկ անբարո կինոնկարներից կամ “եվրաստանդարտով անցած” հեռուստահաղորդումներից տներ “թափվող” խուժանությունից ու կիսահայհոյախառը խոսքից… պրծում չկա կարծես:
Պարբերաբար “Լուսանցք”-ը եւ այլ տպագրական զլմ-ները անդրադառնում են այս ցավոտ թեմային…
Օրերս Հայ Արիական Միաբանության “Ոգու պահապաններ” ուսանողական եւ երիտասարդական կազմակերպության Վանաձորի մասնաճյուղը նույնպես անդրադարձել է այս խնդրին: Քաղաքում թռուցիկներ են տարածվել, փակցվել, որոնցում կոչ է ուղղված ՀՀ հեռուստաընկերություններին:
Այդ կոչում մասնավորապես ասվում է. “Վերանայե՛ք ձեր ժամանցային հաղորդումները, քանզի դրանցում առկա է այլասերում, որը վտանգում է մեր ազգի ապագան”: Երիտասարդները կարծում են, որ հեռուստաեթերը վաղուց կորցրել է ազգային ու բարոյական դաստիարակիչ իմաստն ու բարձր մակարդակը, հայեցի խոսքն ու իրական արվեստի ուսանելի բնույթը:
Հայ Արիական Միաբանության ուսանողներն ու երիտասարդները բողոքում եւ հայկական հեռուստաընկերություններին են դիմում. “Բարոյականացնե՛նք հայկական հեռուստաեթերը”:
Գոհար Վանեսյան
“Լուսանցք” Թիվ 130, դեկտեմբերի 18 — 24, 2009թ
ՎԱՀԱԳՆԱԿԱՆՉ 
Թողնել պատասխան