Ղարաբաղյան շարժումն էլ են վեց հոգով սկսել

by

Երեկ «Սարդարապատ» շարժումը փորձագետների եւ քաղաքացիական հասարակության ներկայացուցիչների մասնակցությամբ «Ընտրությունների այլընտրանքը» թեմայով քննարկում էր նախաձեռնել: Բանախոսներն էին «Տեղեկատվական տեխնոլոգիաների հիմնադրամի» տնօրեն եւ «Սարդարապատի» նախաձեռնող խմբի անդամ Գարեգին Չուքասզյանը, ՌԱՀՀ կենտրոնի տնօրեն Մանվել Սարգսյանը, քաղաքագետ Անդրեաս Ղուկասյանն ու «Հայ կրթական հիմնադրամի» խորհրդի նախագահ, քաղաքագետ Նվարդ Մանասյանը:

Երեկվա քննարկման մասնակից բոլոր բանախոսները առաջիկա ընտրությունների ազատ եւ արդար լինելու, ի վերջո՝ մեր երկրում քաղաքական գործընթացները ժողովրդավարական հուն տեղափոխելու հարցում կարեւորեցին առաջին հերթին քաղաքացիական հասարակության դերը: Նախ՝ Գարեգին Չուքասզյանը ներկայացրեց թեմայի շուրջ «Սարդարապատ» շարժման տեսակետը: Նրա արձանագրմամբ՝ վերջին 15 տարվա ընթացքում՝ մասնավորապես վերջին երեք տարիներին, Հայաստանում քաղաքացիական հասարակությունն ակտիվացել է, եւ ըստ փորձագետների՝ նույնիսկ ինքնուրույն գործոն է դառնում, ինչը ընտրությունների փուլում պետք է հաշվի առնել: «Բայց արդյոք քաղաքացիական հասարակությունն ի վիճակի կլինի՞ իր ձեռքը վերցնել երկրի ճակատագիրը, եւ մենք կունենա՞նք ընտրությունների այս արատավոր շրջանից դուրս գալու հնարավորություն»,- հռետորական հարցադրում արեց Շարժման ներկայացուցիչը: Բանախոսի ասելով՝ անկախ այն բանից՝ ընդդիմադիր ուժերը մասնակցելու են առաջիկա ընտրություններին, թե ոչ՝ նրանց առջեւ, միեւնույն է, կանգնելու է հետեւյալ հարցադրումը՝ ո՞րն է լինելու այն պատասխանը, որը տրվելու է ընտրությունները հերթական անգամ կեղծվելու դեպքում: Արդյոք պետք է անմիջապես, այսօրվանի՞ց պատրաստվել այդ սցենարին, ինչպե՞ս ենք պատկերացնում այլ ընդդիմադիր ուժերի եւ քաղաքացիական հասարակության ներկայացուցիչների հետ համատեղ գործելու, միասնական ճակատ ձեւավորելու հարցը, եւ կա՞ արդյոք քայլերի հաջորդականության կամ ընթացակարգի ուրվագիծ: Այս հարցաշարին «Սարդարապատը» պատասխանում է՝ «Մեզ համար ամենակարեւորն այն է, որ քաղաքացիական ակտիվացած հասարակությունն ուժեղանա: Չմասնակցելով ընտրություններին՝ մենք միեւնույն է՝ օգտագործելու ենք այդ կապիտալը ընտրությունների ժամանակ: Մենք այսօր եւեթ սկսում ենք ձեւավորել այլընտրանքային իշխանության սաղմերը: Առաջին փուլում այլընտրանքային ճակատի կամ կորիզի ստեղծումն է, երկրորդում՝ դրա ընդլայնումը՝ քաղաքական ակտիվացման հին ու նոր տեխնոլոգիաների կիրառմամբ, երրորդում պետք է տեղի ունենա անմիջական ժողովրդավարացման իրացում»:

ՌԱՀՀ կենտրոնի տնօրեն Մանվել Սարգսյանի մատուցմամբ՝ կուսակցությունները չեն կարող երկրում համակարգային փոփոխություններ իրականացնել, որովհետեւ, նրանց ընկալմամբ, համակարգային փոփոխություն ասելով իրենք հասկանում են ընդամենը իրենց իշխանության գալը: Փորձագետի մատուցմամբ՝ աշխարհում համակարգային փոփոխությունների՝ հեղափոխությունների հաջող փորձերը վկայում են, որ դրանց սկիզբը դնողը քաղաքացիական հասարակությունն է՝ իր ուլտիմատիվ պահանջները քաղաքական ուժերին առաջադրելով եւ դրանք իրացնելու պահանջ դնելով:

Քաղաքացիական հասարակության կողմից ակտիվ քայլերի արդյունավետությունը գնահատելու համատեքստում բոլոր բանախոսները որպես կոնկրետ օրինակ բերեցին բնապահպան ակտիվիստների համառ եւ հետեւողական պայքարը, որի արդյունքում փաստացի փրկվեց Թռչկանի ջրվեժը, ու հիմա էլ փորձ է արվում փրկել Քաջարան գյուղը: Բայց երբ այդ նույն բնապահպան ակտիվիստները հարցրին, թե բացի սեմինարներ կամ քննարկումներ անելուց՝ ի՞նչ է առաջարկվում անել, ե՞րբ են իրենք դուրս գալու կոնկրետ պայքարի, որ այլեւս տուն չգնան՝ պատասխանն այսպիսին եղավ. եթե դուք ձեր ակտիվությունը դրսեւորեք՝ մենք ձեզ հետ կլինենք: Ղարաբաղյան շարժումն էլ են վեց հոգով սկսել:

ՆԱԻՐԱ ՄԱՄԻԿՈՆՅԱՆ

«Առավոտ» օրաթերթ 23.12.2011

Advertisements

Թողնել պատասխան

Fill in your details below or click an icon to log in:

WordPress.com Logo

You are commenting using your WordPress.com account. Log Out / Փոխել )

Twitter picture

You are commenting using your Twitter account. Log Out / Փոխել )

Facebook photo

You are commenting using your Facebook account. Log Out / Փոխել )

Google+ photo

You are commenting using your Google+ account. Log Out / Փոխել )

Connecting to %s


%d bloggers like this: